संसदेच्या ६0 व्या वर्धापन दिनानिमित्त उद्या, रविवार दि. १३ रोजी सकाळच्या सत्रात दोन्ही सभागृहांची विशेष बैठक तर सायंकाळी संयुक्त बैठक होणार आहे. सकाळी ११ ते सायंकाळी ५ वाजतापर्यंत दोन्ही सदनांची बैठक होईल. त्यानंतर सायंकाळी राज्यसभा व लोकसभेची संयुक्त बैठक केंद्रीय सभागृहात होणार आहे.
दोन्ही सदनाच्या बैठकीत ‘भारतीय संसदेचा ६0 वर्षांचा प्रवास’ या विषयावर चर्चा होणार आहे. लोकसभेत सदनाचे नेते प्रणव मुखर्जी तर राज्यसभेत सदनाचे नेते पंतप्रधान मनमोहन सिंग चर्चेला प्रारंभ करतील.
याशिवाय आणखी पाच पुस्तकांचे प्रकाशन केले जाईल. त्यात ‘संविधान सभेच्या महिला सदस्यांची निवडक भाषणे’ समाविष्ट आहे. संसदेच्या वर्धापन दिनानिमित्त सांस्कृतिक कार्यक्रम आयोजित करण्यात आला आहे.
प्रख्यात संतूरवादक पंडित शिवकुमार शर्मा, सतारवादक देबू चौधरी, कर्नाटक शास्त्रीय गायक महाराजपुरम रामचंद्रन, प्रख्यात गायिका शोभा मुद्गल, इकबाल खान आपली कला सादर करणार आहेत.
संसदेच्या ६0 व्या वर्धापन दिनानिमित्त पाच व दहा रुपयांचे विशेष नाणे आणि डाक तिकीट राष्ट्रपती प्रतिभाताई पाटील यांच्या हस्ते जारी केले जाणार आहे. याशिवाय राष्ट्रपतींच्या हस्ते तीन पुस्तकांचे लोकार्पण केले जाईल. ‘सदस्यांचा परिचय : पहिली लोकसभा’, ‘लोकसभेचे अध्यक्ष’ व ‘लोकसभेची ६0 वर्षे : एक विश्लेषण ’ अशी ही तीन पुस्तके आहेत. लोकसभा सचिवालयाने ही पुस्तके प्रकाशित केली आहेत.